Portada Multimedia
Multimedia
Uhintifada 344: Koldo Salazar: «Andinia egitasmoa sinismoaren sorrerako testuetan ere planteatu zuten, eta helburua Patagoniako baliabide naturalak bereganatzea da» PDF Inprimatu Email
UHintifada
2019/03/21

Azken aldian, areagotu egin dira Argentina eta Chileko Patagonian Israelgo esku hartzeak eragin dituen salaketak. Batez ere, herri maputxea da injerentzia hori salaten ari dena. Hori dela eta, aste honetako atalean Andinia Egitasmoa delakoaren analisian sakondu nahi izan dugu Koldo Salazar Lopezen eskutik. Salazar idazle eta analista politikoa da Ekialde Hurbileko eta Afrikako eskualdean espezialitatua,  eta “La cuestión israelí, crónica de la resistencia palestina” liburuaren eta otralectura.com blogaren egilea. Bere jardunean, gure solaskideak aztertu du Amerikako hegoaldea kolonizatzeko egitasmo israeldarra. Horretarako sionismoaren sorrerako testuetara jo du, izan ere, Theodor Herzlek berak, bere idazkietan, Israelgo balizko estatua Patagonian ezartzeko aukera planteatu zuen. Geroztik, eta mende luzez, talde sionistak saiatu izan dira eskualde horretako lurrak kolonizatzen. Egileak baztertu egin du proiektu horren asmoa Israelgo estatuaren balizko porrotaren aurrean alternatiba bat sortzea denik; aitzitik; haren ustez asmoa da eskualde horretako baliabide natural oparoak bereganatzea, izan ere, baliabide horiek urriak dira Palestinan, eta beharrezkoak haien estatu proiektu espansionista elikatzeko. Egitasmo horren ondorio praktikoa izan da azken urteotan gero eta israeldar gehiago joaten direla eskualde horretara. Gehienak soldadutzako azken urteko militarrak izaten dira, motxilero kamuflatuta, eta euren berezko izaeragatik talka egiten dute bertako populazioarekin. Bestalde, salatu du lobby sionistak gutxietsi nahi dituela proiektu kolonialista horren aurkako kritikak eta teoria konspiratibo antisemitak direla esanez egiten duela.

 
UHintifada 342: Helena Bengoetxea: «Palestinan okupazioak bizitzako arlo guztiak menperatzen ditu, baita futbola ere, kirola eguneroko bizimoduko jarduera baita» PDF Inprimatu Email
UHintifada
2019/03/04

MarkazMarkaz Shabab Tulkarem izen bereko errefuxiatuen eremuko futbol taldea da, Tulkarem hirian, Zisjordaniako lurralde okupatuetako iparraldean. Jokalari errefuxiatuez osatutako taldea izanik, ohiko taldeek ez dituzten oztopoei aurre egin behar izan diete: aurrekontu murritza, azpiegituretan gabeziak, taldekideen mugikortasun zailtasunak... Hala eta guztiz ere, errefuxiatuen kanpamenduko kultur ekimen baten baitan sortutako kluba lehenengo mailan jokatzera ere iritsi da. Iruñeko kazetari talde batek Markaz Tulkaremeko jokalarien bizipenak eta goraberak jarraitu zituen iragan urteko denboraldian, eta esperientzia horiek laster argitaratuko duten argazki liburu batera biltzeko lanetan dabiltza: Markaz Tulkarem, el retorno del equipo refugiado. Erreportari horietako bat izan dugu solaskide aste honetan Uhintifadako mikrofonootan, Helena Bengoetxea. Kazetari eta dokumentalgile naparrak azaldu digu zein baldintzetan garatzen den kirol jarduera eremu okupatuetan, eta zer nolako zailtasunei egin behar dieten aurre errefuxiatuek futbolean aritzeko. Azken batean, futbola, eta oro har kirola eta jolasa, eguneroko bizimoduaren jarduerak dira, eta bizitzako beste arlo asko bezala okupazioak baldintzatuta daude. Adibidez, kontatu du taldekide asko kartzelatik pasatu direla, eta askoren etxean presoak eta martiriak daudela. Halaber, azpimarratu du futbolean aritzea, bizitzako beste edozein jardueran aritzea bezala, bizitzari eustea da; eta Palestinan bizitzea irautea da.

 
UHintifada 341: Barbara Demurtas: «Tranbia azpiegitura egonkorra denez, ilegalki okupatutako eremua eremu anexionatua bilakatzen du» PDF Inprimatu Email
UHintifada
2019/02/25

TranviaAste honetako atalean Euskal Herria nazioarteko iritzi pubublikoaren jomugan jarri duen afera batean sakondu nahi izan dugu. Duela aste batzuk CAF enpresako langile batzordeak, ahobatez, eskaera egin zion faktoriako zuzendaritzari Jerusalemeko tranbiako eraikuntzarako lizitaziotik erretira dadin, izan ere, proiektuak nazioarteko legadia eta palestinarren giza eskubideak urratzen ditu. Azpiegitura honek dakartzan ondorio sozial eta estrategikoak aztetzeko Barbara Demurtas izan dugu solaskide Uhintifadako mikrofonootan. Demurtas Mundu Bat erakundeko kidea da eta Jerusalem Ekialdean bizi da. Bere jardunean azaldu digu tranbiak marra berdetik ekialdera ezarritako kolonietako eremuak Jerusalemeko hirigunearekin lotzen dituela eta, ondorioz, eremu ilegalki okupatu horiek anexionatutako eremu bihurtzen dituela. Horrek eremuen anexioa eta politika kolonialak indartzen ditu. Halaber, garraio publiko hau bertako populazio palestinarrarentzat betatuta dagoen bitartean, kolonoak auzune palestinarretara iristea ahalbidetzen du. Azaldu duenez, trenbidea epe luzerako egitasmo baten osagaia da, eta azken helburua Al Quds-Jerusalemeko populazio palestinarra desagertaraztea da, Jerusalemen Israelgo behin betiko hiriburua ezartzeko asmoa gauzatzeko. Bestalde, azaldu ditu helburu horren mesedera Israelek baliatzen dituen neurri legalak, administratiboak eta urbanistikoak.

 
UHintifada 340: Koldo Saenz (LAB): «Egoera sozioekonomiko honetan langileek giza eskubideak hobestea lan zamaren aurrean erabaki ezohikoa bezain ausarta da» PDF Inprimatu Email
UHintifada
2019/02/20

cafDuela aste pare bat hautsak harrotu zituen albiste bat iritsi zitzaigun Beasain (Gipuzkoa) aldetik. CAF enpresako langile batzordeak eskaera helarazi zion faktoriako zuzendaritzari, Jerusalemeko tranbiako proiektuko lizitaziotik erretira dadin. Hainbestekoa izan zen ekimenaren oihartzuna, PLOko (Palestinako Askapenerako Erakundea) zuzendaritzak ere Gipuzkoako lantegiko beharginei bidalitako gutun batean eskertu egin baitie palestinarren giza eskubideekiko keinu solidarioa. Euskal trengintza enpresak azpiegitura horren eraikuntzan parte hartzeko lehiaketan sartuta dabil eta langileek errefuxatu egin dute proiektu horren parte izatea, izan ere, azpiegitura horrek nazioarteko zuzenbidea eta palestinarren giza eskubideak urratzen ditu. Batetik, trenbidea okupatutako eremuetan zehar eraikiko dute, eta horrek talka egiten du nazioarteko legediarekin. Bestetik, garraiobide hori kolono ilegalek baino ezingo dute erabili, beraz, bertako populazio palestinarra baztertu egiten du. Areago, apartheid azpiegitura hori israelgo administrazioaren gabiketa etniko politikaren ezinbesteko elementua da; izan ere; horren bidez, Zisjordaniako kolonoen auzune ilegalak Jerusalemeko hirigunearekin lotu eta palestinarren auzuneak hirigunetik fisikoki banatuko ditu. Horrela, Jerusalemeko bertako populazio palestinarra garbitu eta demografia eraldatu nahi dute.

Aste honetako atalean Koldo Sanz izan dugu solaskide Uhintifadako mikrofonootan. Sanz LAB sindikatuko nazioarteko harremanetarako arduraduna da. Bere jardunean CAFeko langile batzordeko sindikatu nagusiko eledunak balioetsi du beharginen erabakia; bere hitzetan, bizi dugun egoera ekonomiko larrian langileek irizpide etikoak lehenestea eta giza eskubideak hobestea lan karga handia ekar liezaiekeen kontratu baten aurrean ezohikoa bezain ausarta delako. Azaldu du sindikatuak BDZ kanpainaren aldarriarekin hartutako konpromezuak manifestuak sinatzetik harago joan behar duela, eta hau bezalako aukerak aurkezten direnean gauzatu egin behar dela. Halaber, ohartarazi du Euskal Herrian asko direla, CAFek bezala, Israelekiko lotura komertzialak dituzten enpresak, eta Beasaingo faktoriak langileen eskakizunaren aurrean hartzen duen erabakia eredugarria izan daitekeela beste hainbat kasutan.

 
UHintifada 339: «Olibondoa erresistentziaren ikurra da, alferrik uzten den olibondo-sail metro bakoitza kolonoek okupatuko duten lur zati bat da» PDF Inprimatu Email
UHintifada
2019/02/11

olivoAste honetako atalean hilero Bilboko BDZ taldeko lagunek eskaintzen diguten kolaborazioetako bat aurkeztu dizuegu. Oraingo honetan Mikel Mariñok taldeko kide bat elkarrizketatu du, Iskra. Iragan urrian Iskrak, Unadikum erakundearen eskutik, olibaren uzta bilketa kanpainian parte hartu zuen . Unadikumek brigadak antolatu ohi ditu urtero, uzta garaian, nekazari palestinarrei olibaren bilketan laguntzeko; izan ere; azken urteotan, eta kolonoek eta armada okupatzaileak burututako erasoak areagotu diren neurrian, uztaren bilketarena arrisku handiko jarduera bilakatu da, eta nekazari palestinarrek nazioaterko ekintzaile solidarioei dei egiten diete zeregin horretan laguntzeko. Israk kontatu du administrazio okupatzaileak oso iraupen laburreko baimenak ematen dizkiela nekazariei oliba biltzeko, eta ondorioz, ahalik eta esku gehien behar dituztela, ahalik eta denbora laburrenean lana burutzeko. Halaber, azaldu du olibondoak garrantzi handia duela Palestinako lehen sektorearentzat ikuspuntu ekonomikotik; baina ez hori bakarrik, garrantzi sinboliko eta estrategiko handia ere badu. Sinbolikoa, mila urtetako olibondoak herri palestinarra antzinatik lur horretan egon deneko lekukoak direlako, eta horrek sionismoaren kontakizun historikoa desmontatzen duelako. Eta estrategikoa, olibondo-sailak dauden bitartean lur horien jabetza palestinarrena izango delako. Okupazioaren presioaren eraginez palestinarrek alferrik galtzen uzten duten sail metro bakoitza, kolonoek bereganatuko duten lur zati bat gehiago izango da. Horregatik, olibondoak, uzta garaian batez ere, kolonoen jomugan daude. Metroz metroko borroka bat da, eta horrexegatik bilakatu da olibondoa Palestinako erresistentziaren ikurra.

 


Banner

TWITTER KI

 

UHintifada