|
|
2022/04/05 |
|
 Iragan martxoaren 26an Sodepaz erakundeak topaketa gastronomikoa antolatu zuen Donostiako Ardatza elkartean. Ekitaldian Nisreen Mashaal sukaldari palestinarrak hartu zuen parte. Mashaal Dheisheh kanpamenduko errefuxiatua da, Bethlehemeko eskualdean, eta bere jardunean Palestinako zenbait plater tipikoren prestaketaren inguruan argibideak eman zien bertaratutakoei. Horrez gain, sukaldaritza saioa aitzakia izan zen errefuxiatu palestinarren bizipenen berri emateko. Mashaalek Euskal Herrira egindako bisita probestu dugu, bide batez, Uhintifadako mikrofonootan elkarrizketatzeko.
Bere mintzaldian familiaren historia kontatu digu. Jerusalemen jaio eta Dheisheh kanpamendua bizi izan bada ere, familiak 1948an kolono sionistek okupatutako herrietan du sorburua, bertatik ihes egin eta errefuxiatuen kanpamenduan bilatu behar izan zuten babesa. Kontatu digu familiak beti eutsi diola noizbait jaioterrira bueltatzeko itzaropenari. Berak behin egin zuen, modu klandestinoan, eta bertatik bertara konprobatu zuen bere aitona zenaren etxean egun kolono juduak bizi direla. Mashaalek ekintzaile estatubatuar baten autoan ezkutatuta egin zuen familiaren herrirako bidaia, aitaren hilobirako harri batzuk hartzera, izan ere, aita jaioterrira bueltatzeko ametsa bete ezinda zendu zen. Bestalde, kontatu digu nolakoak ziren bizi baldintzak errefuxiatuen kanpamenduan, bere esanetan espetxe erraldoi bat bezalakoa baitzen. Mintzatu zaigu okupazio armadak egunero egiten zituen erasoez, bizi baldintza jazanezinez, eta aitortu digu horrexek bultzatu zuela seme-alabekin batera babesa Madrilen bilatzera. Palestinako sukaldaritza tradizionalaz ere hitz egin digu, eta azaldu digu okupazioak gastronomia ez ezik elikagaien horniketa ere baldintzatzen duela. Salatu du, bereziki, Gazako egoera, izan ere, kostaldean izanagatik, Israelek ezarritako setioa dela medio palestinarrak ezin dira itsasoratu arrantza egitera. Kritikatu du Israelek, hutsetik sortutako estatu artifiziala eta ondare kulturalik gabekoa denez, bertako kultura palestinarreko elementu asko lapurtu dituela, besteak beste, gastronomia, eurentzat hartu baitute palestinarrena. Azaldu du gaur egun Palestinako familiarekin harremanetan jarraitzen duela, eta kezkaz jarraitzen duela hango egoera politikoaren egunerokotasuna; eta bestetik, aldarrikatu du haiek ez direla errefuxiatuak, errefuxiatuta daudela eta, erbestean biziagatzik, egunen batean familiak utzi behar izan zuen herrira bueltatuko direla, Israelgo okupazioak ezin baitu betiko iraun.
|
|
|
2022/03/22 |
|
 Pasa den astean Euskal Herriko zenbait tokitan "CAF jaitsi zaitez Israelen apartheidaren trenetik" koalizioaren txostena aurkeztu zen. Gipuzkoako konpainia Jerusalem Ekialdeko eremu okupatuetako kolonia ilegalak hirigunearekin lotuko dituen trenbide linea eraikitzeko lanetan dabil, eta proiektu hori bertan behera geratzeko kanpiniak bi urte bete dituela-eta txosten bat kaleratu du ibilbide horren laburpena egiteko. Proeiktuak modu nabarmenean urratzen du nazioarteko legedia, hori dela eta, Euskal Herrian haren kontrako kanpainia jarri zen abian eta 70 erakundetik gorak egin zuten bat eskaerarekin. Gerora, bi urte eskasen buruan mundu zabalera zabaldu da kanpainia, izan ere, Israelgo apartheidaren aurkako nazioarteko BDZ mugimenduak beretzat hartu eta hedatu egin du.
Bi urte hauetan burututako eta txostenean bildutako ekintzen errepasoa egiteko Ester Muñoz izan dugu gonbidatuta Uhintifadako mikrofonootan. Muñoz Gasteizko BDZ taldeko militantea da eta bere jardunean kanpainaren testuinguruan antolatutako jardueren errepasoa egin digu. Halaber, salatu du ekintza horiek Euskal Herriko prentsako hedabideetan izan duten oihartzuna, salbuespenak salbuespen, hutsaren hurrengoa izan direla, euskal konpainia batek Nazioarteko Zuzenbidearen aurkako urraketa hain nabarmen batean parte hartzea oso larria bada ere. Nabarmendu du proiektu hau nazioarteko legediaren oso urraketa larria dela, eta horregatik, mundu osoan antolatu direla CAFen interesen aurkako boikot kanpainiak, eta nazioarte mailan Beasaingo konpainiaren aurka antolatu diren ekintzen berri zehatza eman digu. Kontatu digu, gainera, zein puntutan dauden Jerusalemeko trenbidearen eraikuntza, azpiegitura honen kontrako kanpainia, eta nola kaltetu duen boikot kanpainia horrek CAFen irudi korporatiboa. Bukatzeko, gonbidatu gaitu kanpainiarekin bat egitera eta haren sare sozialen bidez informatzera.
Beste aldetik, hizpide izan dugu Ahmad Manasra ume palestinarra askatzeko kanpainia. Manasrak 13 urte dauzka, Israelgo erregimeneko kartzela militar batean dago, eta atxilotu zuten momentutuk tortura larriak pairatu ditu.
|
|
2022/03/17 |
|
 Iragan otsailaren 14an Bakea Duintasunez erakundeak online mintegi bat antolatu zuen: "Palestinako okupazioa azaltzeko kontakizun berriak". Topaketa honetan kazetaritzako profesionalak eta Palestinaren aldeko ekintzaileak bildu ziren Palestinako okupazioari eta erresistentziari ematen zaien kazetaritza-trataeraren inguruan hausnarrean. Mintegiaren ardatza Lubnah Shomaliren solasaldia izan zen. Shomali Palestinako populazio errefuxiatuaren eskubideak artatzen dituen Badil Center erakundeko kidea da. Shomalik azaldu du bere jardunean Palestinako afera jorratzerakoan terminologiak duen garrantzia. Ibilbide historiko bat egin du etengabeko Nakba deritzon prozesuan zehar, hau da, Israelgo estatua sortu zenetik gaur egun arte nola erbesteratu eta mugiarazi duten bertako populazio palestinarra. Kritikatu du prentsako hedabide hegemonikoetan ez dagoela tokirik Israelek burututako gizateriaren aurkako krimenetarako, eta normalean krimen horiek samurtzen dituzten adierak erabiltzen direla, hala nola, "gatazka" bezalako adierak. Salatu du, halaber, Israelek egiturazko indarkeria burutzen duela bertako populazio palestinarraren kontra, populazio hori mugiarazteko eta populazio kolonoz ordezkatzeko. Hori kolonizazioa da, gizateriaren aurkako krimen bat, ez da "asentamendu" bat. Bestalde, defendatu du "apartheid" adieraren erabilera, izan ere, hainbat erakundek, besteak beste NBEk berak, onartu egin dute; eta salatu du adiera horrek ere ez daukala tokirik prentsa orokorrean. Kolonizazio krimenaren aurrean aldarrikatu du erresistentziarako eskubidea, izan ere, nazioarteko legediak edozein bidetatik eusteko eskubide hori onartzen die. Hortaz, Palestinako erresistentziari, armatua zein armagabea, ezin zaio deitu terrorismoa, nazioarteko zuzenbideak onartzen duelako.
|
|
2022/03/08 |
|
 Pasa den astean Gerald Darmanin Frantziako Barne Ministroak Palestina Vaincra (Palestinak Irabazi) kolektiboa ilegalizatzeko egitasmoa ezagutarazi zuen. Erabakia eskuin muturreko talde Israelzaleek burututako difamazio kanpainia baten ondorioa izan da, izan ere, Israelek Frantzian dituen jarraitzaileek jomugan jarri dute elkartasun talde hau. Taldearen jarduna Palestinarekiko elkartasun ekintzak eta konzientziatzio kanpainak antolatzera bideratuta dago; eta baita kolonialismoa, arrazakeria eta apartheidaren kontrakoak ere. Ilegalizazio iragarpen hau beste pausu bat izan da Frantziako gobernuak darabilen autoritarismo goradakadaren barruan, izan ere, azken aldian arrazakeriaren kontra diharduten beste hainbat erakunde eta ezkerreko komunikabide ere ilegalizatu dituzte edo ilegalizatzeko bidean daude.
Egoera honen berri izateko Matthieu Jeuland dokumentalgile eta ekintzailea izan dugu gonbidatuta Uhintifadako mikrofonootan. Jeuland Palestine Vaincra mugimenduko kidea da eta bere jardunean kontatu digu Tolosan (Frantzia) sortutako kolektibo honek Palestinako herria eta erresistentzia laguntzea duela helburu. Halaber, azaldu digu errefuxiatuen itzulera, preso palestinarren askatasuna eta "ibaitik itsasorainoko" Palestina libre, demokratiko eta kulturartekoa aldarrikatzen dutela. Salatu du taldea sortu zutenetik Israelen aldeko eskuin muturreko taldeen erasoak pairatu dituztela, eta talde horiek aspalditik ari direla bere taldearen ilegalizazioa eskatzen. Azaldu du, gainera, ilegalizazio honek motibazio politikoa duela, ez legala, eta denboran bat egin duela Frantziako jarrera aldaketa batekin Israelekiko. Izan ere, Frantziako diplomaziaren jarrera erradikalizatu egin da eta, besteak beste, Jerusalem onartu berri dute Israelgo hiriburutzat, nazioarteko kontsentsuarekin talka eginez. Bestalde, ilegalizazioa Europa osoan dagoen kanpainia baten barruan kokatu du, eta kanpainia horren helburua Palestinarekiko elkartasunerako eta Israelen aurkako boikot mugimendua kriminamizatzea dela adierazi du. Zoritxarrez, azaldu duenez, bere taldea ez da bakarra izan, eta ilegalizazioak aurrera jarraituko balu ezingo lukete kolektiboa berrantolatu. Nolanahi ere, hala balitz, bilatuko lukete beste bideren bat euren ekintza solidarioarekin jarraitzeko.
|
|
2022/03/01 |
|
 Aste honetako atalean gai ilun bezain ezezaguna izan dugu hizpide: zenbakien hilerriak. Erregimen sionistak hamarkadak daramatza prozedura hau ezartzen palestinarren gorpuei, bereziki erresistentzia ekintzetan akabatuak izan direnei. Okupazio erregimenak martiri palestinarren hilotzak bahitu eta, hilda egonagatik, epaitu ere epaitzen ditu, zenbaitetan hozkailuetan mantenten ditu gatibu, eta horrela urtetan gordetzen ditu, hildakoen familiari erantsitako zigor kolektiboa ezartzeagatik. Jokabide anker honen inguruan hitz egiteko Sausan Al Khouli izan dugu solaskide Uhitifadako mikrofonootan. Al Khouli Alkarama emakume palestinarren mugimenduko kidea da. Badira aste batzuk erakunde horrek afera honen inguruko mintegia antolatu zuela. Topaketan senitarteko hilakoen gorpuak bahituta dituzten bi pertsonaren testigantza jaso zuten, izan ere, haien senideen gorpuak okupazio erregimeneko indar armatuek hartu zituzten gatibu. Gure solaskideak kontati digu gaur egun 254 ekintzaile hildakoen gaorpuak daudela egoera horretan eta Zisjordaniaren inguruko lau hlierritan dituztela. Zenbakien hilerri horietan okupazio armadako soldaduak baino ezin dira sartu. Salatu du, halaber, jokaera anker eta bihozgabe hori zigor kolektibo bat dela, eta haren helburua dela palestinarrak hildakoan ere libre izango ez direlako ideia transmititzea.
|
|
|
|
Multimedia 
